यीशु रा भी ईहंणा

लगभग 2,000 का भी ज्यादा बर्षा का, पूरे संसारा में बहू लोका यीशु मसीहा रे सुसमाचारा शुणदे लागे दे साहा | कलीसिया बढ़दी लागी दी | यीशु बाईदा करू कि संसारा रे लास्टा में मांह फिरि ईहंणा | एबरे तणी नाईं आउअ ,पर तेऊ आपणा बाईदा पूरा करणा |

ज़ेबा कि हामे यीशु रे वापस ईहंणे न्याह्ल़े लागे दे , दईब च़ाहंदा कि हामे एढा जीवन जिए ज़ोह पवित्र हो | ज़ोह तेऊ बे आदर दिंदा हो | सह यह भी च़ाहंदा कि हामे दूजे बे भी तेऊ रे राज्य रे बारे में खोज़े | ज़ेबा यीशु पृथ्वी में रहंदा तिही तेबा तेऊ बोलू , “मेरे चेले दुनिया में हर ज़ाघा लोका बे दइबा रे राज्य रे बारे में पबित्र समाचारा रा प्रचार करले , होर तेहुकि लास्ट ईहंणा |”

बहू लोके एबरे तणी यीशु रे बारे में नाईं शुणु | सर्गा बे बापस नाहंणे का पहिले ,यीशु मसीहा (मसीह लोका) बे बोलू कि मांह त्याह लोका बे शुभ समाचार शुणाए ज़ुणी कधी भी नाईं शुणु | तेऊ बोलू , "नाहाँ होर सारे जनसमूहा रे लोका चेले बणा !" होर , "खेच लउणे बे पाकी दे साहा !”

यीशु यह भी बोलू, “एक सेबक आपणे मालका का बडअ नाईं हूँदअ | ठीक एउ संसारा रे लोके भी माँईं संघा बइर (अईब) करू ,एउ साबे त्याह तमे भी मेरे कारण सताऊणे होर मारी पाऊणे | एउ साबे तमा भी दुःख भोगणा पड़णा | पर हिमत डाहा माँईं राकसा बे ज़ोह एउ संसारा में राझ करा सह माँईं हराऊ द साहा | अगर तमे लास्ट तणी मेरे प्रति बफादार रहले ,तेबा तमे दईबा यीशु बचाऊणे !”

ज़ेबा जगता रा अंत होला तेबा लोके संघा कैह हूँणा तेतके बारे में यीशु आपणे चेले बे एक कथह शुणाई तेऊ बोलू , “एकु मणशे आपणे खेचे शोभला बेज़ा बऊ | पर ज़ेबा सह सूतअ तिही , तेबा तेऊ र दुशमण इच्छी करे गिहूँ मझे ज़गली बेज़ा बई करे नाठअ |”

ज़ेबा लागदा लागा, तेबा तेऊ मणशा रे सेबके बोलू , 'मालका, तमे आपणे खेचे शोभला बेज़ा बऊ दा तिही | तेबा एता में ज़गली दाणे कंधा का आउए ?' मालके उतर दिना ?' कुणी दुश्मणे बई होला |”

"दासे मालका बे उतर दिना, 'कैह हामे नाहीं करे ज़गली डाल़ा पेचु ?' मालके बोलू ,'नाईं' | ज़ेबा तमे एढा करले , तेबा तमा कुछ गिहूँ भी पेचणे | लउणे तणी न्याल़ा होर तेहुकि ज़गली डाल़ कठे करी करे ज़ाल़ने बे एक ढेर लाए ,पर गिहूँ मेरे खेचे कठे करे |

चेले कथा रा अर्थ नाईं समझी पाई , एतकि त्याहे यीशु बे एता समझाऊणे री बिनती करी |” यीशु बोलू कि, “जूणी मणशे शोभला बेज़ा बउ सह मसीहा रा प्रतिनिधित्व करा | खेच संसारा रा प्रतिनिधित्व करा | होर शोभला बेज़ा दईबा रे राज़ा रा प्रतिनिधित्व करा |”

जंगली जंगली दाणे त्याह मणशा रा प्रतिनिधित्व करा ज़ोह दुष्टा का सम्बधित साहा | जूणी शत्रु जंगली बेजा बउ सह राकसा रा प्रतिनिधित्व करा | लउणा संसारा रे अंता रा प्रतिनिधित्व करा, होर फसल लउण आल़े दईबा रे दूता रा प्रतिनिधित्व करा |”

ज़ेबा संसारा रा अंत होला , तेबा ज़ोह लोका राकसा रे साहा त्याह सभे लोका स्वर्गदुता एकी बारी कठे करणे होर त्या एक ज़ल़दी आगी में पाऊणे, ज़खे त्या भयंकर दाहू रे कारण लेरने होर आपणे दांद च़ाबणे | तेबा धर्मी लोका आपणे बापू दईबा रे राज़ा में सूरज़ा रे बराबर चमकणे |”

यीशु यह भी बोलू कि संसारा रे अंता का ठीक पहिले पृथ्वी पेंदे भी फिरि ईहंणा | तेऊ तेहू साबे फिरि ईहंणा ज़ासु साबे सह अखा का नाठअ द तिही , अथार्त, तेऊ रा एक भौतिक शरीर हूँणा होर सह सरगे बादल़ा पेंदे फिरि ईहंणा|ज़ेबा यीशु फिरि ईहलअ , तेबा हर मसीह ज़ोह मुंअं द साहा सह मुंएँ दे मेंज़ा का जिउंदअ हूँणो होर तेऊ संघा सरगे भेटणा |

तेबा ज़ोह मसीही तेऊ टाईमें जिउंदे हूँणे त्या सरगे उझे उठणे होर ज़ोह मुंएँ दे मेंज़ा जिउंदे होई दे त्याह मसीह लोके संघा या भी मिलणे | त्या सभे तखे यीशु संघा हूँणे | तेता बाद, यीशु पूर्ण शान्ति होर एकता में आपणे लोके संघे सदा रहंणा ।

यीशु बाहिदा करू दा साहा कि हर सह मणश जूणी तेऊ पेंदे बुशाह करू दा साहा , तेऊ जीवना र मुकत भेटणो | त्या सदा पूर्ण शान्ति में दईबे संघा रहंणे होर राझ करणा |

पर ज़ोह यीशु पेंदे बुशाह नाईं करले दईबा त्याह मेज़े हर एकु रा न्याय करणा | तेऊ त्या नरका में फेंकणे , ज़खे त्या वेदना में सदा लेरणे होर दाँद पिशणे | सह आघ ज़ोह कधी नाईं हिश्ती त्या सदा ज़ाल़दे रहंणा होर चिउं त्या सदा खादें रहंणे |

ज़ेबा यीशु फिरि ईलअ तेबा तेऊ राकसा होर तेऊ रा राझ सदा बे खत्म करणा | तेऊ राकस नरका में पाऊणो | ज़खे सह त्याहे लोके संघा सदा ज़ल़दअ रहंणो, ज़ुणी दईबा री गला मनणे रे बजाए तेऊ री गला मनणे रा चुनाव करू |

किबेकि आदमे होर हव्वा दईबा री गला नाईं मनी होर एसा दुनिया में पाप आणु, एतकि तणी दईबे याह बे श्राप दिना होर खत्म करणे रा निर्णय करू |पर एकसा दिहाड़ी दईबा एक नउंअं सरग होर एक नउंईं पृथ्वी री रचना करणी ज़ोह सिद्ध हूँणी |

यीशु होर तेऊ रे लोक नउंईं पृथ्वी में रहंणे, होर तखे ज़ोह कुछ भी साहा तेता पेंदे सदा राझ करणा | तेऊ हर आशु टूशणे होर तेहुकि तखे कोई दुःख,उदासी ,लेरना,बुराई ,दाह या मऊत नाईं हूँणी | यीशु आपणे राज़ा पेंदे शान्ति होर न्याय संघा शासन करणा, होर तेऊ सदा आपणे लोके संघा रहंणा |

बाइबला री कथा का साहा : मती 24: 14 ; 28: 18 ; यूहन्ना 15:20, 16: 33 ; प्रकाशितवाक्य 2: 10 ; मती 13 : 24-30 ; 36-42, थिस्सलुनीकियो 4 : 13-5 : 11; याकूब 1: 12 ; मती 22: 13 ’ प्रकाशितवाक्य 20: 10 , 21 : 1-22 ; 21